Réxime Interno AFA

REGULAMENTO DE RÉXIME INTERNO

Asociación de Familias de Alumnado do CEIP Luís Seoane

PREÁMBULO

O presente Regulamento de Organización e Réxime Interior establece as normas polas que debe rexerse a Asociación de familias de alumnado do CEIP Luís Seoane. Estas normas definen os requisitos de funcionamento interno, tanto para as persoas asociadas como para os distintos órganos e comisións que compoñen a Asociación, así como para calquera usuario/a dos servizos que ofrece a Asociación.

Este Regulamento entra en vigor o mesmo día da súa aprobación pola Asemblea Xeral Ordinaria e terá vixencia por tempo indefinido.

O presente Regulamento poderá ser revisado ou modificado, a proposta de 2/3 da Xunta Directiva ou de polo menos un 25% das persoas asociadas, tendo que ser sometido á aprobación dunha Asemblea Xeral Extraordinaria, obtendo o voto favorable de 2/3 das persoas asociadas presentes e representadas.

Este Regulamento desenvolve os contidos expresados nos Estatutos da Asociación e en ningún caso poderá ir en contra da súa filosofía nin articulado.

Capítulo I

COMUNICACIÓN COA ASOCIACIÓN

Artigo 1º. – Para facilitar a comunicación existen tres canles:

Os membros da Xunta Directiva, aos que se poderán dirixir para calquera dúbida ou suxestión.

Correo electrónico: info@afaceipluisseoane.org

Chamada ou WhatsApp: 656 995 518

Páxina web: http://afaceipluisseoane.org

Artigo 2º. – Os membros da Xunta Directiva, ademais das funcións recollidas nos Estatutos, recollerán as inquietudes, propostas e impresións relativas a Dirección do Centro, Consello Escolar, actividades extraescolares, etc., e daránlles seguimento.

Capítulo II

SOCIOS/AS DA ASOCIACIÓN

Artigo 3º. – Terán a condición de persoa asociada todas as persoas que así o soliciten mediante a correspondente solicitude de asociación dispoñible na páxina web, e que cumpran as condicións recollidas nos Estatutos:

" Para adquirir a condición de persoa asociada requírese ser nai, pai ou titor/a legal de alumnado matriculado no CEIP Luís Seoane e aceptar os presentes estatutos.

A condición de persoa asociada adquirirase unha vez cuberta a ficha de inscrición na Asociación facilitada pola Xunta Directiva e aboada a cota correspondente, que terá carácter anual e será por unidade familiar."

As familias non asociadas non poderán beneficiarse de prezos, promocións, descontos nin actividades de acceso exclusivo para persoas asociadas.

Artigo 4º. – As persoas asociadas comprométense, polo feito de selo, a respectar e cumprir co establecido neste Regulamento e nos Estatutos da Asociación. Como persoas asociadas de pleno dereito, teñen todos os dereitos e obrigas que marcan os Estatutos e a normativa vixente de asociacións.

Artigo 5º. - Perderase a condición de persoa socia, sen dereito á devolución da cota abonada, cando se produzan algunhas das causas recollidas nos Estatutos, Capítulo II, Artigo 8º:

a) Por vontade propia, que se fará efectiva mediante presentación de renuncia, por escrito ante a asociación. A renuncia terá efectos desde a data da súa presentación.

b) Por baixa dos fillos ou fillas matriculados/as no centro.

c) Falta inxustificada de pagamento das cotas anuais da asociación, dos servizos ofrecidos pola asociación (actividades extraescolares, comedor, etc.), das derramas e demais achegas establecidas pola Asemblea Xeral. Será efectiva desde a notificación do acordo adoptado pola xunta directiva, a persoa interesada.

A persoa que perdese a súa condición de asociada polo suposto sinalado no apartado anterior, poderá ser rehabilitada na súa condición de asociada, se abonase as cotas pendentes de pago e o aproba a Xunta Directiva.

d) Por incumprimento dos presentes estatutos, normativas propias ou dos acordos validamente adoptados polos órganos da asociación, así como pola realización de accións que prexudiquen gravemente os intereses da asociación.

e) Pola utilización da Asociación con fins alleos aos específicos desta.

Artigo 6º. - No caso de baixa do alumno/a no Centro escolar producirase baixa inmediata das actividades extraescolares e servizos asociados.

Capítulo III

XUNTA DIRECTIVA

Artigo 7º. - Ademais das funcións dos Estatutos, a Xunta Directiva realizará:

• Informar e asesorar sobre actividades da Asociación.

• Fomentar dereitos e deberes das familias.

• Apoiar alumnado e familias con necesidades educativas ou sociais.

• Colaborar co profesorado no bo funcionamento do Centro.

• Elaborar e manter actualizado o listado de actividades extraescolares.

• Apoiar o desenvolvemento das actividades durante o curso escolar.

• Manter activa a páxina web.

• Rexistrar altas e baixas de persoas asociadas e actividades.

• Recoller queixas e opinións.

• Elaborar e facer cumprir o regulamento de actividades e servizos.

Artigo 8º. - A Xunta Directiva será responsable de custodiar, manter e actualizar os Libros de Actas, Libros de Contas, Listaxes de persoas asociadas, selo oficial da Asociación e calquera outro elemento que lles atribúan os Estatutos.

Artigo 9º. Os arquivos serán responsabilidade do/a Secretario/a e poderán ser consultados por persoas asociadas, exceptuando documentación privada ou datos persoais.

Artigo 10º. - Segundo os Estatutos da Asociación, Capítulo III, Artigo 15º: “A Xunta Directiva estará composta por un mínimo de cinco membros: Presidente/a, Vicepresidente/a, Secretario/a, Tesoureiro/a e Vogais”.

Ademais, a Xunta Directiva poderá nomear delegados-colaboradores con funcións determinadas durante un período de un curso; dichos delegados poderán asistir ás reunións da Directiva (con voz, pero sen voto) nas que se traten os temas ou actividades para os que se solicitou a súa colaboración; dito nomeamento deberá reflectirse nas actas da Directiva

Artigo 11º. - A asistencia dos membros da Xunta Directiva ás reunións ás que sexan convocados é obrigatoria. No caso de non poder acudir deberán informar ao/a Secretario/a ou Presidente e xustificar o motivo da ausencia.

Artigo 12º. - A ausencia dun membro da Xunta Directiva a máis de tres reunións sen xustificación, ou a cinco con xustificación, será motivo suficiente para ser cesado, deixando o seu cargo á disposición da Xunta Directiva para ser cuberto por outra persoa socia que previamente presentasen candidatura.

Artigo 13º. - Convocaranse novas eleccións se dimite o/a Presidente/a ou se dimite o 50% ou máis da Xunta Directiva. Se algún membro cesa antes de rematar o seu mandato, o cargo será cuberto por outro membro da Xunta Directiva, notificándose na Asemblea Xeral.

Artigo 14º. - As reunións da Xunta Directiva celebrarase coa periodicidade necesaria para manter as contas ao día e coordinar todas as funcións e xestións da Asociación.

Artigo 15º. - A Xunta Directiva saínte comprométese a entregar os libros de control da Asociación debidamente actualizados á Xunta Directiva entrante tras un proceso electoral, así como a informar sobre proxectos pendentes ou en curso. Cederá tamén os datos de control sobre correo electrónico, páxina web e redes sociais, procedendo do mesmo modo coa documentación propia da Asociación.

Capítulo IV

XESTIÓN ECONÓMICA

Artigo 16º. - Para a autorización de calquera compra que non sexa un gasto menor, deberán solicitarse, como mínimo, dous orzamentos, e a factura abonada deberá coincidir exactamente co orzamento aprobado. Ambos xustificantes (orzamento e factura) arquivarase de forma conxunta.

Artigo 17º. - Considerarase gasto menor aquel que non supere os 100,00 €. Nestes casos, bastará co visto bo do/a Presidente/a e do/a Tesoureiro/a.

Artigo 18º. - Calquera gasto ou transacción económica que non sexa menor deberá ser aprobada ou autorizada en reunión da Xunta Directiva.

Artigo 19º. - Cualquier cambio de contas, entidades bancarias, etc., deberá ser aprobado en Xunta Directiva.

Artigo 20º. - Os candidatos/as á Xunta Directiva deberán estar ao día do pagamento para presentar a súa candidatura.

Capítulo V

ACTIVIDADES EXTRAESCOLARES

Artigo 21º. - Coa finalidade de facilitar a conciliacion familiar a asociación facilita as persoas asociadas un catálogo de actividades e servizos complementarios en coordinación co centro educativo. 

As actividades extraescolares desenvolveranse de luns a xoves desde as 16:00 ás 18:00 horas. 

O alumnado que acuda a estas actividades estará a cargo dos correspondentes profesores ou monitores que se responsabilizarán da súa atención e deberán cumprir coas normas expecíficas de cada actividade. 

Artigo 22º. - Deberán cumprirse as seguintes normas xerais:

• Para facer uso das actividades extraescolares é imprescindible ser socio da Asociación. 

• A inscrición nas actividades realizarase nos prazos establecidos a través do formulario de “Ficha de inscripción de actividades extraescolares” da páxina web da Asociación. Aceptar as normas de convinvencia e recibir a confirmación de praza por parte da Asocición. 

• As actividades deberán estar ao día de pagamento para poder participar nelas.

• Os pagos deben realizar entre o día 1 e 5 do mes en curso. Os métodos aceptados de pagamento son pago en man no local da Asociación ou a través de trasnferencia bancaria indicando o nome completo do alumno e actividades as que acude. 

• O alumnado inscrito en actividades extraescolares deben estar correntes de pago do Seguro de Accidentes antes do inicio das actividades.

• Os/as monitores/as comezarán puntualmente as clases, e os pais, nais ou titores/as e o alumnado deberán ser puntuais na chegada e recollida. Establécese un período de cortesía de 10 minutos; transcorrido este tempo, considerarase retraso efectivo e comezará a facturarse un importe de 10 € por cada hora ou fracción de hora de retraso. En casos reiterados, a Asociación poderá expulsar ao alumno/a da actividade.

• A recollida do alumnado realizarase exclusivamente nos accesos autorizados polo centro educativo e pola Asociación. Os pais, nais ou titores/as legais non poderán acceder ao interior do centro, agás nos casos en que conten con autorización expresa para tal efecto, teñan concertada previamente unha reunión co profesorado ou coa Dirección, ou acudan ao local da Asociación nas datas e horarios establecidos para tal fin.

• So quedan autorizados para a recollida do alumnado os titores legales. En caso de autorizar a recolliga a outra persona, debe ser firmado a través do formulario de “Autorización saida de actividades extraescolares” con anterioridade e comunicalo a coordinadora de actividades. 

• As baixas deberán comunicarse antes do día 20 de cada mes á correo: actividadesceipluisseoane@gmail.com. De non ser así cobrarase o seguinte mes.

• Non se garantirán devolucións agás causas xustificadas debidamente acreditadas.

• Non se admitirán devolucións unha vez formalizada a reserva.

• O incumprimento destas obrigas poderá supoñer a liberación da praza, a criterio da Xunta Directiva.

• No caso de accidente ou enfermidade durante a actividade, avisaranse os tutores legais por teléfono; se é grave, avisarase ao 112.

• O pagamento da primeira cota supón coñecemento e aceptación deste Regulamento.

Artigo 23º. - A reserva require asistencia á actividade e pagamento da cota dende o primeiro día do curso ou mes de inscripción. 

Artigo 24º. - Non se permitirán cambios de actividade durante o trimestre, salvo por causas xustificadas. Se o alumno desexa un cambio de actividade, deberá solicitalo nos prazos establecidos e sempre que quede praza dispoñible no trimestre seguinte.

Artigo 25º. - A Asociación poderá expulsar ao alumnado por impago ou incumprimento do Regulamento/Estatutos, non admitíndose reserva noutras actividades.

Artigo 26º. - Os titores deberán comunicar calquera alerxia, intolerancia, enfermidade ou necesidade especial do alumnado.

Artigo 27º. - Se non se alcanza o mínimo de inscritos/as, a Asociación poderá suspender a actividade; pódese optar por outra con prazas libres, sen compromiso de realización. Se xa se abonou o mes, devolverase o importe da actividade (non a cota de socio/a) en 30 días.

Artigo 28º. - Se a demanda supera a capacidade, publicarase a orde de selección e crearase lista de espera.

Artigo 29º. - Os grupos e horarios poderán modificarse en beneficio do bo funcionamento.

Capítulo VI

COMEDOR ESCOLAR E SERVIZO DE MAÑANCEIROS

Artigo 30º.- A contratación do servizo de comedor escolar é unha función do Consello Escolar do centro (ou dos órganos da Administración educativa nos que se delegue), sendo este órgano o encargado de aprobar o protocolo, xestionar a empresa adxudicataria e supervisar o seu funcionamento. A Asociación participa representando ás familias no Consello Escolar e supervisando que o funcionamento do servizo se axuste ao contratado.

O servizo de comedor e de madrugadores, así como os tempos de recreo entre o horario escolar e as actividades extraescolares, teñen como finalidade facilitar a conciliación laboral e familiar, garantindo unha alimentación equilibrada e velando pola calidade do servizo prestado.

Artigo 31º.- A xestión do comedor está cedida a unha empresa externa, que se encarga da admisión de prazas, do cobro das cotas, da xestión do comedor, da elaboración dos menús mensuais e da coordinación do servizo. Os asociados que contraten este servizo deberán atender e cumprir as normas propias da empresa xestora do mesmo.

Artigo 32º.- A empresa xestora do comedor dispón de toda a información do servizo, así como dos formularios de inscrición, na súa páxina web www.jardanaycomedores.es Ademais, dispón dun canal de comunicación directa, ben a través do/a Coordinador/a do Servizo de Comedor, ou ben a través do enderezo electrónico comedor@jardanay.es Calquera suxestión ou incidencia deberá ser comunicada á empresa xestora.

Artigo 33º.- As incidencias ou suxestións que sexan comunicadas á Asociación serán transmitidas á empresa xestora e, de ser o caso, á representación do Consello Escolar, para que sexa o órgano competente quen adopte as medidas oportunas.

Artigo 34º.- Non é requisito pertencer a Asociación para facer uso dos servizos do comedor, pero os asociados poden ter condicións ventaxosas de prezos.

Capítulo VII

COTAS E BENEFICIOS DOS ASOCIADOS

Artigo 35º.- Cotas das persoas asociadas

As familias asociadas deberán aboar as cotas establecida pola Asociación, cuxa contía será aprobada en Asemblea Xeral.

Artigo 36º.- Beneficios das persoas asociadas

As familias asociadas disporán dos beneficios establecidos pola Asociación polo mero feito de ostentar a condición de asociadas. Estes beneficios estarán vinculados aos servizos, actividades e acordos que a Asociación determine en cada momento.

Artigo 37º.- Publicidade das cotas e beneficios

As cotas e os beneficios vixentes da Asociación serán publicados na páxina web oficial da mesma, unha vez aprobados en Asemblea Xeral.

Artigo 38º.- Modificación e incorporación de beneficios

A Xunta Directiva poderá incorporar novos beneficios para as persoas asociadas, sempre que a dita decisión sexa aprobada por unha maioría de dous terzos (2/3) dos seus membros.

Así mesmo, as persoas asociadas poderán suxerir ou solicitar modificacións nas cotas ou nos beneficios durante a Asemblea Xeral, debendo ser aprobadas por maioría simple das persoas asistentes.

Artigo 39º.- Revisión extraordinaria das cotas

A Xunta Directiva poderá determinar unha subida das cotas por causa de forza maior, tales como incrementos imprevistos por parte dos provedores, ruptura do servizo ou outras circunstancias excepcionais. Dita decisión deberá ser debidamente xustificada e ratificada posteriormente en Asemblea Xeral.

Artigo 40º.- Comunicación dos cambios

Calquera cambio nas cotas, beneficios ou condicións aplicables ás persoas asociadas será comunicado cunha antelación mínima de quince (15) días e terá efectos a partir do mes seguinte á súa comunicación.

Artigo 41º.- Achega para a excursión de fin de curso de 6º de Educación Primaria

A Asociación colaborará cunha achega económica de 50 euros (50 €) destinada á excursión de fin de curso do alumnado de 6º de Educación Primaria.

Para poder beneficiarse desta achega será requisito imprescindible que o alumno ou alumna pertenza a unha unidade familiar que teña a condición de socio/a da Asociación durante os cinco anos inmediatamente anteriores, que teña abonado íntegramente as cotas correspondentes e que non teña débedas pendentes noutros servizos ofertados pola Asociación.

No suposto de que un alumno ou alumna repita o curso de 6º de Educación Primaria, só poderá beneficiarse desta achega nunha única ocasión.

No caso de que o centro educativo non leve a cabo a excursión de fin de curso, as familias non poderán reclamar o importe da achega, quedando esta sen efecto.

O importe correspondente ás achegas non aplicadas será destinado ao fin que determine a Xunta Directiva da Asociación.

Capítulo VIII

PARTICIPACIÓN ACTIVA DOS ASOCIADOS

Artigo 42º.- Participación das familias socias

A Asociación fomentará a participación activa das familias socias nas actividades, proxectos e iniciativas organizadas pola mesma, co obxectivo de contribuír á mellora da vida educativa e comunitaria do centro.

As familias socias comprométense, na medida das súas posibilidades, a colaborar e participar nas actividades promovidas pola Asociación, favorecendo un clima de cooperación e implicación colectiva.

Artigo 43º.- Propostas e suxestións de actividades

As familias socias poderán comunicar á Asociación suxestións ou propostas de novas actividades, obradoiros, talleres ou iniciativas que consideren de interese para a comunidade educativa.

Calquera achega ou proposta será recibida e valorada pola Xunta Directiva, sendo necesaria a súa aprobación expresa para a inclusión da mesma no programa oficial de actividades da Asociación.

Artigo 44º.- Colaboración en actividades e beneficios asociados

A Asociación valorará positivamente a colaboración activa das familias socias na organización, desenvolvemento ou apoio ás actividades promovidas pola mesma.

A Xunta Directiva resérvase o dereito de aplicar beneficios, bonificacións ou descontos ás persoas socias colaboradoras nestas actividades, de acordo cos criterios que se establezan en cada caso.

Artigo 45º.- Buzón de suxestións

A Asociación porá á disposición das familias socias un buzón de suxestións a través da súa páxina web oficial.

Mediante este medio poderán formularse propostas de mellora relativas a todas as áreas xestionadas pola Asociación, así como suxestións destinadas a seren trasladadas ao Consello Escolar, cando así proceda.

Artigo 46º.- Respecto ao persoal do centro e das actividades

O alumnado, así como os pais, nais ou titores/as legais, deberán manter en todo momento unha actitude de respecto, corrección e cordialidade absoluta cara aos/ás monitores/as, coidadores/as, persoal de limpeza e persoal de cociña, recoñecendo que se atopan no exercicio das súas funcións laborais. Non se tolerarán comportamentos, expresións ou actitudes que menoscaben o seu traballo, dignidade ou autoridade no desempeño das súas tarefas.

Capítulo IX.

RELACIÓNS COA COMUNIDADE EDUCATIVA E CO CONTORNO INSTITUCIONAL

Artigo 47º.- O AFA manterá unha relación de colaboración permanente coa Dirección do centro e co profesorado, participando activamente na mellora do proxecto educativo, apoiando a organización de actividades complementarias e extraescolares e canalizando as propostas, suxestións e necesidades das familias. Así mesmo, promoverá a participación dos pais e nais na vida do centro e exercerá a súa función de representación no Consello Escolar, de acordo coa normativa vixente.

Artigo 48º.- O AFA fomentará a participación do alumnado na vida do centro educativo e manterá unha relación de respecto e colaboración coa figura de representación estudantil, no caso de que exista, aínda que sexa de carácter simbólico. Para tal fin, estableceranse reunións de carácter trimestral co obxecto de coñecer de primeira man as inquietudes, propostas e demandas do alumnado, favorecendo valores de participación democrática, diálogo e corresponsabilidade.

Artigo 49º.- O AFA manterá relación e coordinación coas institucións públicas e demais entidades do contorno (concello, administración educativa, servizos sociais ou outras organizacións), co fin de colaborar na mellora das infraestruturas, impulsar programas educativos, culturais ou sociais e defender os intereses da comunidade educativa, contribuíndo á integración do centro no seu ámbito social.

Capítulo X.

XESTIÓN DE CONFLITOS

Artigo 50º.- Resolución de conflitos 

Os conflitos resolveranse de maneira dialogada, conforme as normativas vixentes e acorde coas Normas de Organización, Funcionamento e Convivencias do centro (NOFC). 

A Xunta Directiva poderá actuar como mediadora, poñendo en coñecemento da Dirección do centro das actuacións, decisións ou sancións efectuadas. 

Artigo 51º.- Tipos de condutas contrarias á convivencia (Art. 203-213 do NOFC) 

Condutas gravemente prexudiciais: 

a) As agresións físicas ou psíquicas, as inxurias e as ofensas graves, as ameazas e as coaccións contra os demais membros da comunidade educativa. 

b) Os actos de discriminación grave contra membros da comunidade educativa por razón de nacemento, raza, sexo, orientación e identidade sexual, capacidade económica, nivel social, conviccións políticas, morais ou relixiosas, discapacidades físicas, sensoriais ou psíquicas, ou calquera outra condición ou circunstancia persoal ou social. 

c) Os actos individuais ou colectivos de desafío á autoridade do profesorado e ao persoal de administración e de servizos que constitúan unha indisciplina grave. 

d) A gravación, manipulación ou difusión por calquera medio de imaxes ou informacións que atenten contra o dereito á honra, a dignidade da persoa, a intimidade persoal e familiar e a propia imaxe dos demais membros da comunidade educativa. 

e) As actuacións que constitúan acoso escolar consoante o establecido polo artigo 28 da Lei 4/2011. f) A suplantación de personalidade en actos da vida docente e a falsificación, alteración ou subtracción de documentos académicos. 

g) Os danos graves causados de forma intencionada ou por neglixencia grave ás instalacións e aos materiais dos centros docentes, incluídos os equipamentos informáticos e o software, ou aos bens doutros membros da comunidade educativa ou de terceiros, así como a súa subtracción. 

h) Os actos inxustificados que perturben gravemente o normal desenvolvemento das actividades do centro, incluídas as de carácter complementario e extraescolar. 

i) As actuacións gravemente prexudiciais para a saúde e integridade persoal dos membros da comunidade educativa do centro ou a incitación a elas. 

j) Portar calquera obxecto, substancia ou produto gravemente perigoso para a saúde ou integridade persoal de calquera membro da comunidade educativa, así como a resistencia ou negativa a entregar os obxectos cando é requirido para iso polo profesorado. 

k) A reiteración, nun mesmo curso escolar, de condutas leves contrarias á convivencia. 

l) O incumprimento das sancións impostas. 

Condutas leves: 

a) As condutas tipificadas como agresión, inxuria ou ofensa, os actos de discriminación, os actos de indisciplina, os danos, os actos inxustificados e as actuacións prexudiciais descritos no artigo 15 da Lei 4/2011 que non alcancen a gravidade requirida no dito precepto. 

b) Portar calquera obxecto, substancia ou produto expresamente prohibido polas normas do centro que sexa perigoso para a saúde ou integridade persoal do alumnado ou dos demais membros da comunidade educativa, ou que perturbe o normal desenvolvemento das actividades docentes, complementarias ou extraescolares, cando non constitúa conduta gravemente prexudicial para a convivencia. 

c) A falta de asistencia inxustificada á clase e as faltas reiteradas de puntualidade. 

d) A reiterada asistencia ao centro sen o material e equipamento precisos para participar activamente no desenvolvemento das clases. 

e) Non respectar os horarios de entrada e saída de clase do seu grupo. 

f) Non seguir as orientacións dos membros da comunidade educativa nas actividades que se desenvolven no centro e na aula mostrando o debido respecto e consideración. 

g) Non respectar o dereito á aprendizaxe dos seus compañeiros e compañeiras. 

h) Non participar nas actividades orientadas ó desenvolvemento do plan de estudos. 

i) O deterioro, non grave, do material ou dependencias do centro. 

j) Practicar xogos que poidan causar danos nos alumnos e alumnas, simular pelexas, etc. 

k) Calquera acto inxustificado que perturbe levemente o normal desenvolvemento das actividades no centro: correr polos corredores, berrar, molestar aos compañeiros, entorpecer o labor de ensino-aprendizaxe na clase, etc. 

Artigo 52º. – Medidas correctoras 

1. Condutas gravemente prexudiciais: 

• Suspensión do dereito a participar nas actividades extraescolares ou complementarias do centro por un período de entre dúas semanas e un mes. 

• Cambio de grupo. 

2. Condutas leves: 

• Amoestación privada ou por escrito. 

• Suspensión do dereito a participar nas actividades extraescolares ou complementarias do centro por un período de até dúas semanas. 

Competencia: dependendo da medida, poden intervir o Coordinador de servizo, os representantes da Xunta Directiva, a Dirección do centro ou representantes delegados pola Dirección. 

Artigo 53º. – Correccións e sancións 

Na adopción de medidas correctoras, deberanse ter en conta os seguintes criterios xerais: 

a) A imposición de correccións procurará a mellora da convivencia no centro. 

b) Deberanse ter en conta, con carácter prioritario, os dereitos da maioría dos membros da comunidade educativa e os das vítimas de actos antisociais, de agresións ou de acoso. 

c) Non se poderán impoñer correccións contrarias á integridade física e á dignidade persoal do alumnado. 

d) Valoraranse a idade, situación e circunstancias persoais, familiares e sociais do alumnado, e demais factores que puidesen incidir na aparición das condutas ou actos contrarios ás normas establecidas. 

e) Deberanse ter en conta as secuelas psicolóxicas e sociais dos agredidos ou agredidas, así como a alarma ou repercusión social creada polas condutas sancionables. F

) As correccións deberán ser proporcionais á natureza e gravidade das faltas cometidas, e deberán contribuír á mellora do clima de convivencia do centro. 

Artigo 54º. – Rexistro de amonestacións e equivalencia de sancións 

Todas as amonestacións, correccións e sancións aplicadas durante as actividades extraescolares, servizos de comedor ou outras actividades da Asociación serán rexistradas de maneira sistemática, indicando a data, o alumnado afectado, a conduta observada e a medida aplicada. 

Este rexistro estará á disposición da Xunta Direciva, do persoal responsable das actividades e, cando proceda, das familias. Tamen se facilitará está información ós representantes do Consello Escolar e a Dirección do Centro. 

A efectos de seguimento e graduación das sancións, establécese a seguinte equivalencia: a acumulación de tres amonestacións de carácter leve considerarase equivalente a unha amonestación de carácter grave, podendo aplicarse as medidas correctoras correspondentes segundo a gravidade da situación. 

O rexistro terá carácter confidencial e será utilizado exclusivamente con fins de control, seguimento e mellora da convivencia nas actividades extraescolares.

Capítulo X.

DISPOSICIÓNS FINAIS

Artigo 55º. – Aceptación do regulamento 

A condición de persoa socia implica a aceptación deste Regulamento, dos Estatutos da Asociación e de calquera outra normativa de organización, funcionamento e convivencia aplicable.

Artigo 56º. – Normativa aplicable e normas específicas 

A Asociación de Familias de Alumnado do CEIP Luis Seoane rexerase, sen prexuízo do establecido neste Regulamento Interno, polas normativas vixentes e polos Estatutos da Asociación. Ademais, poderá establecer normas de convivencia ou de funcionamento específicas para o correcto desenvolvemento das actividades realizadas, que deberán ser respectadas por todas as persoas asociadas e participantes. 

Artigo 57º. – Entrada en vigor 

O presente Regulamento entra en vigor o mesmo día da súa aprobación pola Asemblea Xeral. 

Unha vez aprobado, darase publicidade a todas as persoas socias. 

Certificación: Constátase que o presente Regulamento foi aprobado en Asemblea Xeral Ordinaria celebrada con data 28 de xaneiro de 2026.

En Oleiros, a 28 de Xaneiro de 2026